verhoog
Christa, wie se opleiding volledig klassiek was, leef haar belangstelling in ligte musiek uit deur by die ALABAMA STUDENTEGESELSKAP onder leiding van Johan van Rensburg op Potchefstroom aan te sluit.
Sy word deur dr Peet van Rensburg van die Departement Spraakleer en Drama versoek om betrokke te raak by hulle MUSIEKBLYSPELE, en sy doen die musiekregie van SOUND OF MUSIC sowel as FIDDLER ON THE ROOF vir hulle.
Nadat sy van tyd tot tyd as beoordelaar vir ATKV CRESCENDO optree, word sy ook as musiekregisseur aangestel.
In samewerking met Jannie word sy musiekregisseur vir TRUK se KERSLIG, VERS EN MELODIE-reeks (musiekregisseur en orkesleier)
Ook vir die televisieprogram DEBUUT tree sy as beoordelaar en musiekregisseur op.
Vanaf 1986 landswye aanbiedinge van BLIK EN SNAAR, onder andere vir JOHANNESBURGSE STADSKOUBURG en TRUK, asook optredes in Europa.
NUUTSTE VERHOOG AANBIEDING : BREL IN BROOKLYN.
Laurika Rauch en Jannie du Toit het twintig jaar gelede laas as ‘n duo op die verhoog saamgewerk, maar Gautengers kry vanaf 20 Julie tot 1 Augustus die geleentheid om dié twee vooraanstaande vertolkers van Jacques Brel se werk in die pragtige nuwe Brooklyn Theatre in Pretoria te hoor. Die titel van die program is eenvoudig BREL IN BROOKLYN, en gehore kan verwag om ’n anderhalf dosyn van die beste Brel-skeppinge in ’n top-uitvoering te hoor. Die program word begelei deur twee briljante musici – Christa Steyn (klavier) en Sergio Zampolli (akkordeon). Die gesoute choreograaf en regisseur, Esther Nasser, is artistieke adviseur, terwyl ’n teaterspesialis wat in die tagtigerjare van sy eerste treë saam met die twee sangers gegee het, Hardus Koekemoer, die beligting en dekor versorg. Frikkie Kruger behartig die klank.
Vroeg in 1988 het Laurika en Jannie opslae gemaak toe hulle by die legendariese Club 58 in Hillbrow een van die eerste Afrikaanse kabarette aangebied het: VAN BERLYN TOT BAPSFONTEIN. Die “kabaretkonsert” soos regisseur Stephan Bouwer dit genoem het, is deur media en publiek – ook Engelstalig - met groot entoesiasme ontvang, en is dwarsoor die land aangebied. Regisseur Stephan Bouwer se volgende program – die bekroonde OP DIE HARTSTOG BOULEVARD – het hulle samewerking voortgesit, en so het die twee kunstenaars ’n betekenisvolle rol gespeel in die vestiging van ’n Afrikaanse kabaret-tradisie. In daardie opspraakwekkende aanbiedinge is telkens musiek “van Brel tot Briel” ingesluit, en alle moontlike emosies is aangespreek. Die twee kunstenaars het egter veral die verbeelding aangegryp met gunstelinge soos “MADELEINE” en ”SONG OF THE OLD LOVERS” waardeur hulle gehelp het om die werk van Jacques Brel, kleinkunsmeester van die twintigste eeu, aan ’n Afrikaanse gehoor bekend te stel. In die jare wat daarop gevolg het, het albei van krag tot krag gegaan en ’n indrukwekkende Brel-repertorium opgebou – Laurika reeds voor daardie tyd in Taubie Kuschlik se gewilde aanbiedinge THE BEST OF BREL en ENCORE BREL, en Jannie veral saam met Christa Steyn in die DE KLEINE MAN-tweeluik in samewerking met Ilse van Hemert.
|
